Frí á Blönduós

Við ákváðum að taka frí í dag og leggja í hann snemma í fyrramáli. Erum búin að taka frá gistingu í Staðarskála annað kvöld. Nú er bara að skoða Blöndós.

Komin á Blönduós

Þá fer að halla á seinni hlutann á ferðalaginu. Í fyrradag hjóluðum við frá Akureyri til Varmahlíðar. Veðrið var bjart og fallegt og hitinn ef til vill í hærri kantinum. Ferðalagið inn Öxnadal gekk vel. Við stoppuðum á Engimýri fyrir miðjum Öxnadal og borðuðum frábæran hádegismat. Mæli eindregið með þessum stað. Það er mun betra að stoppa þarna og borða en að stoppa á einhverri vegsjoppu og borða lélega hamborgara. Öxnadalsheiðin tók við 10 km eftir matinn og var hún okkur þung í hitanum. Hins vegar var rennslið frábært niður Norðurárdalinn en þegar kom á flatann í Skagafirðinum og um 30 km voru eftir óhjólaðir rauk hann upp með norðan belgingi og það sem ég hélt að væri klukkustundar reið varð að tæplega þriggja tíma. Komum í Varmahlíð klukkan sjö. Fengum enga gistingu á staðnum og ákváðum að halda áfram og gista í Stóra Vatnsskarði. Við voru því búin með hálfa Vatnsskarðsbrekkuna þegar við komumst í náttstað.Alls hjóluðum við 106 km þennan dag sem var nokkuð strembin byrjun fyrir litlu systur. Við þetta fór kílómetratalan hjá mér í 1105 km. Það fór vel um okkur í Stóra Vatnsskarði og sváfum við til 10 en rifum okkur þá upp og fengum okkur morgunmat með sniglabandinu (þeir gistu þarna - voru að skemmta Sniglunum sem eru með landsmót í Húnaveri)

Það var létt verk að klára Vatnskarðið og bruna svo niður í Bólstaðhlíð og út Langadalinn. Þá vorum við komin á Blöndós og tókum okkur á leigu hús á tjaldstæðinu. Nú erum við að velta fyrir okkur hvort við eigum að bíða af okkur umferð helgarinnar og halda ferðalaginu áfram á morgun mánudag.

Viskídrykkja á þjóðvegi eitt - litla systir er komin

Tók upp tjaldið og lagði af stað frá Mývatni klukkan 11. Veður var gott en smá gjóla í fangið meðan ég hjólaði norður fyrir vatnið. Brekkan upp úr Laxárdal var létt enda hjólamaðurinn vel hvíldur. Ég var með vindinn á móti út Reykjadalinn. Fékk mér hamborgara á Laugum og svo varð það heiðin aftur og nú tók aðeins meira í. Þegar kom í Bárðadalinn tók við gott rennsli sem hélst í raun að Víkurskarði. Fnjóskadalurinn skartaði sínu fegursta og sá ég vel inn á Flateyjardalsheiðina þar sem ég fór á gönguskíðum á fimmtugsafmæli mínu í vetur. Víkurskarðið var frekar erfitt en eftir það var þetta létt rennsli. Magnús og Sigrún voru að koma úr Grenivík og keyrðu fram á mig. Þau tóku myndir af mér þar sem ég renndi fram hjá. Þegar ég kom að útsýnispallinum við austanverðan Eyjafjörð var þar fyrir rúta og maður sem stóð með útrétta viskíflösku. Voru þar komnir dönsku eftirlaunaþegarnir sem ég hitti í Jökuldal fyrir nokkrum dögum. Þetta voru miklir fagnaðar fundir og mér boðið upp á viskístaup í tilefni dagsins. Magnús og frú eru hér í íbúð og buðu mér að dvelja hjá sér. Fékk dásamlegan grillmat með góðum gestum. Thelma systir er mætt á staðinn og ætlar að hjóla með mér til Reykjavíkur.  Hér fyrir neðan er myndin sem Magnús tók.

Allt í gódí fíling í sól og blíðu í Mývatnssveitinni

Hetja dagsins er Magnús Ingólfsson sem ég vakti í morgun og gerði út af örkinni til að kaupa dekk og slöngu og koma því á sendiferðabíl fyrir 11. Þetta tókst og mér bárust varahlutirnir klukkan tvö. Hjólið var komið í lag korteri seinna. Maður er orðinn nokkuð klár í að gera við. Átti langt og skemmtilegt spjall við Skoskan hjólamann um hjól og hjólreiðar. Veit núna að þeir sem seldu mér hjólið vissu ekkert hvað þeir voru að segja. Fyrir það fyrsta hefði ég átt að skipta út teinum og setja þykkari teina. Í öðru lagi hefði ég átt að vera með dempara á hnakk. Í þriðja lagið hefði ég átt að vera með "on road off road" dekk. Þau eru millistig milli götudekkja og fjalladekkja. Hann var líka með breiðan og góða pedala og sérlega hentuglaga lögun á bremsu höldum og gíraskiptum. Veit þetta næst. Hins vegar er ég sannfærður um að gamli garmur skili mér heim og eigi eftir að reynast gott "borgarhjól" eins og Skotinn kallaði það. Sá er búinn að vera að hjóla um heiminn í 40 ár. Skotinn hældi hins vegar kerrunni góðu og sagði að þetta hjól hefði ekki þolað feitar hliðartöskur til viðbótar við feitann hjólreiðamann (mér fannst nú svo lítið dónlegt að kalla hliðartöskur feitar - eins og þær hafi engar tilfinningar). Fór í jarðhitaböðin í sólinni og blíðunni. Fannst of mikið að borga 2000 kall fyrir þann drullupoll. Mæli frekar með sundlauginni hérna fyrir 500 kall. Sérstaklega ef fólk er með börn. Það er mun meira við að vera fyrir þau.

Flugan er í algjöru lágmarki en fuglalífið hreint frábært. Flórgoði með unga fimm metra frá tjaldopinu. Margar ólikar endur en enga hef ég séð húsöndina þó þær eigi að teljast einkennisfugl hér. Þær eru hins vegar á mismunandi stöðum í vatninu eftir vindum og liggja líklega sunnanvert við það þar sem er meira af flugu. Nóg í bili....

Ævintýri á heiðum - lögreglan kemst í málið

Lagði af stað frá Jökuldalnum í gær þriðjudaginn 30. júni. Ferðin upp brekkuna gekk vonum framar enda lofthiti lægri en daginn áður og ég úthvíldur eftir nóttina. Þegar upp úr dalnum kom tók við frábær hjólreiðartúr yfir Jökuldalsheiðina með öllum sínum tjörnum og flám. Hver tjörn var skreytt einu álftarpari sem ýmist var á hreiðri eða með unga. Talandi um svanasöng á heiðum. Langidalur og Mörðudalsöræfi tóku við með sýnu hrjóstruga og berangurslega landslagi. Hrein undraveröld að hjóla í gegnum. Svo niður brekkuna að Grímsstöðum á fjöllum þar sem ég hugðist gista en ákvað að taka 40 km í viðbót yfir á Mývatn. Þegar ég átti eftir 25 km ófarna sprakk hjá mér. Ég skipti um slöngu en nýja slangan reyndist gölluð og rifnaði við ventilinn. Fór að skoða dekkið betur og komst að því að það var ónýtt. Þar sem ég lág grenjandi yfir vanda mínum bar að tvo lögregluþjóna þá Hreiðar og Ingvar. Þeir eru í Lögregluliði Húsavíkur. Hreiðar lagði til að við notuðum plástur á dekkið þar sem vírarnir stóðu út sem við og gerðum. Eftir að löggan var búin að setja plástur á dekkið gerði ég við og pumpaði í og viti menn þetta hélt - næstum því. Ég komst að Námaskarði þegar þetta gaf sig aftur og teymdi hjólið þá 7 km sem ég átti ófarna inn á Mývatn. Klukkan farin að ganga tíu þegar ég komst í gistingu. Nú er Magnús Ingólfsson, sem er staddur í orlofsíbúð á Akureyri, að reyna að redda mér dekki og koma því á rútu fyrir ellefu. Ef það tekst er ég "up and running" klukkan fimm í dag. Gæti þá lagt aftur á djúpið eða beðið með það til morguns. Hér er frábært veður sól og 20 stiga hiti (eða meira). Bestu þakkir til þeira Hreiðars (eða hét hann Heiðar) og Ingvars lögregluþjónanna góðu á Húsavík. Svona eiga lögreglumenn að vera. Ég gerði þá samstundis að liðsmönnum í sérsveitum Hringfarans.

Risaeðla í Tjörupitt

Lagði af stað frá Egilstöðum í fyrradag. Ferðin gekk vel nema fyrir það að hitinn var óbærilegur. Um 25 gráður og sól. Mörg vandamál var ég búinn að sjá fyrir en ekki það að festast í tjöru vegna of mikils hita. Þetta var nú samt raunin. Hitinn var svo mikill að tjaran blæddi úr málbikinu og festist við dekkkinn. Hún óðst upp á mig allan og róðurinn þyngdist mjög þar sem þetta snarlega jók viðnámið. Ekki alveg það sem maður þurfti í þessum hita. Þegar kom inn í Jökuldalinn lagaðist tjörumálið en ég var hins vegar orðinn mjög þreyttur þegar ég var kominn Jökuldalinn á enda þá búinn að hjóla 50 km. Við blasti hin ógurlega brekka upp úr Jökuldalnum og mér féllust hendur yfir því púlli að leiða hjólið þar upp. Þá tók ég eftir því mér til ánægju og yndis að komin var greiðasala í gamlaskólanum alveg við endan á dalnum. Þar rekur hann Aðalsteinn í Kirkjuseli Hreindýrasetrið - gististað með sundlaug. Þarna er líka Hákonarstofa helguð minningu Hákons Aðalsteinssonar hagyrðings og móðurbróður Aðalsteins verts. Ég ákvað að gista þarna og var þar í góðu yfirlæti með hópi danskra eldriborgara sem tók lagið við varðeld í Hákonarstofu þá um kvöldið. Hafðu bestu þakkir Aðalsteinn fyrir ánægjulegar samræður og kvöldstund.

Legg aftur af stað á eftir

Eftir svona eina klukkustund legg ég aftur af stað eftir góðann frídag á Egilsstöðum við vatnið "mitt". Í gær þvoði ég af mér á tjaldstæðinu og átti alveg frábæran dag.  Hiti yfir 20 gráður og sól. Ég eyddi deginum með þeim stöllunum Ástu (sjá http://www.thjodarsalin.blog.is/blog/thjodarsalin/), Sigrúnu og Söru en þær voru í sólarverkfalli frá vinnu sinni á upplýsingamiðstöðinni. Um kvöldið fór ég út að borða á matsölustaðnum í Gistihúsinu Egilstöðum, gamla bænum sem þorpið dregur nafn sitt af. Þetta er hreint frábær staður með góðum mat á sanngjörnu verði. Mæli neð honum. Veðrið er flott í dag. Heiðskýrt og fer vafalaust í 20 stiginn eða meira. Ég verð fáklæddur á hjólinu í dag. Nú stefni ég upp á heiðar og verð þar næstu daga þannig að líklega verður ekki blogg hér frá mér fyrr en ég næ á Mývatn eða eftir tvo daga. Þ.e.a.s. nema að tröllin taki mig.

Á Egilstöðum í fallegu veðri og 20 stiga hita

Þá er ég kominn úr þokunni á fjörðunum í sólina á Héraði. Það gekk vel að hjóla þessa 50 km frá Fáskrúðsfirði yfir á Egilstaði. Lítil umferð í göngunumn enda laugardagmorgun og því lítil mengun í þessum tæplega 6 km göngum. Þegar kom í Reyðarfjörðinn tók Fagradalsheiðin við. Hækkun úr 20 m í 380 m. Fyrst mjög bratt en síðan hægar. Þegar að kom á vatnaskil tók sólin við af skýjaða veðrinu og það hallaði undan fæti í átt að Egilstöðum. Var kominn þar um 1 leitið. Lét laga hjólið og kom mér svo fyrir í gistingu. Ætla að hvílast hér á morgun leggja á fjöll á mánudaginn. Alls búinn að hjóla 731 km! Nú eru trússararnir farnir heim og ég því aftur kominn með kerruna góðu í drátt.

110 km að baki í dag kominn á Fáskrúðsfjörð

Flottur dagur á hjóli í dag. Hjólaði tæpa átta tíma í stilltu veðri. Sjórinn rennisléttur.  Hreint dásamlegt að hjóla svona í fjörunni innan um fuglinn. Eina sem ég get kvartað yfir er að það var frekar lágskýjað þannig að ég naut ekki hinna fögru fjalla á þessu svæði en landslagið neðan skýja var hrein frábært. Það var alveg himneskt að hjóla fyrir Stöðvarfjörð og in Fáskrúðsfjörðinn í þessari stillu.  Þá er það stuttu dagur á morgun 33 km niður á Egilstaði eða er það upp á Egilstaði. Þar fæ ég vonandindi endanlega viðgerð á gírum. Ferðin er formlega hálfnuð. Allt gengur vonum framar. Búnaðurinn reynist vel og engin veikleikamerki enn komin fram hjá hjólreiðamanni. Sjö níu þrettán.

Kominn á Djúpavog - þreyttur og hrakinn

Það tokst! Lagði af stað klukkan 10:30. Lenti strax í sterkum vind þegar ég kom út úr bænum. Strengurinn í gegnum göngin um Almannaskarð var svo sterkur að ég varð að ganga með hjólið. Þegar í gegn kom tók aðeins betra við og  hélst svo að Stafafelli heimabæ Gunnlaugs. Þegar fram hjá var komið tók við hreint hörmulegt rok og var leiðin frá Stafafelli að Þvott árskriðum hreint helvíti. Margoft feykti vindurinn mér af hjólinu. Einu sinni hallaði ég svo upp í vindinn á ferð minni að hné kom við götuna.  Aftur og aftur þurfti ég að stíga af baki og ganga. Þá reif vindurinn stundum hjólið úr höndunum á mér. Sem betur ber fer var ég ekki með kerruna. Familían var með hana í trússi. Þau náðu mér  við Þvottárskriður þar sem ég sannast sagna var að niðurlotum kominn. Eftir smá næringu lyftist landið á ný. Ég afréð að senda  þau til að finna gistingu og koma svo aftur til að sækja mig. Ég ætlaði að  hjóla á meðan. Það var hins vegar eins og við manninn  mælt. Þegar ég kom út úr bílnum var komið mun skaplegra veður. Ferðin um skriðurnar var hreint frábær  sem og um Álftafjörðinn. Þar var komið logn og fjörðurinn spegilsléttur. Þegar "hjálparsveitin" kom til að sækja mig afþakkaði ég og lauk ferðinni alla leið til Djúpavogs. Alls hjólaðir 100 km á tæpum átta tímum. Meðalhraði tæpir 13 km. Sannarlega erfiðasti dagurinn til þessa en samt - eftir á að hyggja mjög skemmtilegur (alla vega eftir heitt sauna á hótel Framtíð). Á morgun er stefnan sett á Fáskrúðsfjörð aðrir 100  km og leiðin verður hálfnuð (nú er ég búinn með tæpa 600 km)