Kominn á Hvolsvöll og er að hugsa um að hjola að Skógum

Sæl öll

Þá er ég kominn á Hvolsvöll. Ferðinn gekk hægt í fyrstu. Bullandi mótvindur og puð. Hugsaði sjálfum mér þeigjandi þörfina að hafa tekið upp á þessu bulli. En svo fór landið að lyftast þegar ég kom fram hjá Þjórsárbrúnni. Þá fór vindurinn að blása í bakið. Stoppaði á Landvegmótum og fékk mér "pulsu með öllu". Rakst þar á systurson minn Elmar Haukson stórsöngvara (hann er hávaxinn og syngur mikið). Eftir það fékk ég hraðbyr á Hvolsvöll og hélt á tímabili 40 km hraða. Tók næstum fram úr bíl á leiðinni en hann gaf aðeins í þegar að hann sá hjólreiðamanninn nálgast. Ég hins vegar söng hástöfum "I want to ride my bicycle" gamall Queen slagari ef ég man rétt. Nú er ég að reyna að gera það upp við mig hvort ég eigi að taka það rólega og skella mér í sund og gista hér í nótt eða nota meðbyrinn og bæta bið 50 km á Skóga.

Fjallasýnin var frábær í dag. Sjóndeildarhringurinn var varðaður snæviþökktum fjöllum.  Búrfell, Hekla, Tindfjöll of Eyjafjallajökull. Hrein frábært! Þetta er eiginlega miklu skemmtilegri en ég þorði að vona. Er að vinna í því að setja myndir inn. Get tekið JPG myndir á videó vélina. Þakka þeim Þóru Kristínu, Kristínu Önnu og Ívari á upplýsingamiðstöðinni á Hvolsvelli afnot af tölvunni.

Kominn á Selfoss

Fyrsti leggurinn gekk vel. Smá mótvindur fyrst í stað en seinn var hann meir skáhalt í bakið. Umferðin var skelfileg en ég vona að það batni þegar ég verð kominn austur fyrir Hvolsvöll. Ég alls 4 tíma austur en þar af var ég hjólandi í rúma þrjá. Þetta voru 54 km. Meðalhraðinn upp á Hellisheiði var aðeins um 10 km á klst enda á fótinn en eftir að hæsta punkti var náð náði ég að halda meðalhraða sem var um 30 km á klst. Fyrir ferðina í heild var hann 15 km á klst. Mesti hraði var 50 km en þá byrjaði hjólið að skjálfa ískyggilega og olli því kerran. Það virðist vera svona hámark að fara í 40-45 km. Vonast eftir að hafa góða framvindu á morgun.

Ég stoppaði í Litlu Kaffistofunni og fékk mér kaffi og með því. Fékk góðar móttökur þar. Alltaf jafngott heimabakaða brauðið með eggjum og reyktum silungi. Stoppaði í Hveragerði og hitti þær stöllurnar Pálínu Agnesi og Elínu Ósk og hélt síðan sem leið lág á Selfoss. Þar ákvað ég að fara í gistingu frekar en að tjalda þar sem ég þurfti að fara í smá útréttingar og vildi síður hafa búnðinn í hirðuleysi í tjaldinu. Leit við á Bókarkaffinu hjá Bjarna Harðarsyni fyrrum þingmanni og hitti þar kunningja minni Hafstein Einarsson sem átti leið um bæjinni með frænda sínum. Bjarni tók vel á móti okkur og mæli ég eindregið með þessum stað fyrir þá sem elska kaffi og bækur (og geta afborið framsóknarmenn :o) Næsta verk var að kaupa nýjan standara á hjólið en sá sem fylgdi því er alveg ómögulegur.

Loks fór ég á rakarastofu og lét snoða mig. Ekki var það gert til að fá meiri straumlíinulögun. Ástæðan var einfaldlega sú að mér fannst ég svitna of mikið undir hjálminum. Hef svo sem enga þörf fyrir þetta hár næsta mánuðinn. Datt svo inn á bókasafnið til að setja inn þetta blogg. Sem sé, allt gengur vonum framar.

 

Ég er lagður af stað.....

Eftir að ég lík þessari færslu legg ég í hann....

Í tilefni af 17. júní...

Allt klappað og klárt - Ég legg í hann í fyrramáli

Nú er ég búinn að pakka öllu. Einn kerrupoki (23 kg með kerru) og tvær hliðartöskur (5 og 4 kg). Alls eru þetta því 32 kg af farangri. Það á eftir að vera erfitt að drösla þessu bröttustu brekkurnar!

Hjólið er komið úr stillingu...

Allt er tilbúið. Kominn með allan búnað og hjólið klárt. Bíð bara eftir góðu ferðaveðri. Hann spáir beggja skauta byr fimmtudag, föstudag og laugardag. Að vísu smá rigning en enginn er verri þó að hann vökni svo framlega að það sé ekki slagveður í fangið...

Munaður.....

Ég er byrjaður að pakka niður og mér er þegar orðið ljóst að ekki kemst allt með sem ég ætlaði að taka. Ég er búinn að fella út stærstu linsuna og þá dettur fóturinn út sem þurfti fyrir hana. Einnig er ég að skoða hvort ekki megi einfalda fatnað.

Hef reyndar ekki miklar áhyggjur af þessu. Veit sem er að á endanum gengur þetta allt upp og ég tek það með sem ég get og annað ómerkilegara verður bara eftir. 

Einn er þó sá hlutur sem ég á svo lítið erfitt með - nefnilega forláta pressukanna sem venjulega fylgir mér á ferðum mínum. Að vísu fer ekkert rosalega mikið fyrir henni. Einnig má setja eitthvað brothætt inn í hana og láta hana þannig þjóna  tvöföldu hlutverki. Því að vera kanna og ílát.

Hins vegar get ég seint sagt að kannan sé bráðnausynlegur hlutur. Eða hvað? Mér verður hugsað til kaldra og votra daga þar sem ég sit og læt mig dreyma einn bolla af pressukaffi og blóta sjálfum mér fyrir að hafa skilið könnuna eftir.

Líklega verður bara ofan á að kannan góða fái að fara með. Hið pökkunarlega gjaldþrot er af þeirri stærðargráðu að ein pressukanna breytir engu til eða frá.

KAG 

Dagsetningin er fastsett!

Eftir að hafa skoðað spána fyrir næstu daga hef ég ákveðið að leggja í hann klukkan 7 að morgni fimmtudaginn 18. júní.

Hjólið kemur úr stillingu á morgun...

Fór með hjólið í útíherslu og stillingu í morgun. Það verður tilbúið seinnipart þriðjudag. Þannig gæti því farið að ég hæfi för á sjálfan þjóðhátíðardaginn.

Búnaður er í lágmarki. Göngutjald, svefnpoki, vatnsheldur poki yfir svefnpoka, termarest dýna, lítill prímus og pottur, pressukanna, vasaljós, verkfæri og varahlutir, fatnaður til þriggja daga, skel og regngalli, lambhúshetta, hjálmur, hreinlætisdót, myndavél með þremur linsum og tveimur flössum, videovél, monpot og léttur þrífótur, gps tæki og þá er það helsta talið. Gæti verið að ég þyrfti að skera eitthvað niður. Það veltur á því hvernig þetta pakkast.

KAG

Fyrirhuguð ferðaáætlun

Undirritaður hefur unnið nokkur sumur sem leiðsögumaður. Þá hef ég farið nokkra hringi um landið á forsendum annara. Mig hefur lengi dreymt um að fara þennan hring á eigin forsendum og tel það best gert með því að hjóla hann.

Ekki er ætlunin að fara í neina keppnisferð þar sem reynt verður að slá hraðamet. Ég stefni að því að hjóla á bilinu 30-96 km á dag. Ef til vill meira suma daga en minna aðra daga. Ég hef með mér göngutjald sem ég ætla að sofa í og dett inn í sveitagistingu af og til til að þvo af mér og hlaða rafhlöður. Aðaláherslan verður á að ljósmynda það sem fyrir augum ber en einnig mun ég hafa með litla kvikmyndatökuvél.  Ég verð á Treck 7300 hjóli með tveimur 15 lítra tösku á böglabera og BoB kerru í eftirdragi. Ég mun elda morgunmat á morgnana og smyrja nesti á daginn en stefni að því að borða kvöldmat á matsölustöðum/sjoppum. Þegar illa viðrar mun ég bíða af mér veður. Þetta á nefnilega að vera skemmtilegt.

Á leiðinni hyggst ég taka hús á vinum og kunningjum sem ég hef kynnst í gegnum leiðsagnarstarfið. Myndbandið og ljósmyndirnar eiga að sýna landið með þeim augum sem ég sé það. Ég hef enga tölvu með mér og tek allar myndir á RAW sniði þannig að ég efast um að ég geti sett inn myndir á bloggið en mun setja inn texta í þau skipti sem ég kemst í tölvu. 

Hér fyrir neðan er áætluð ferðaáætlun. Hafa ber í huga að þetta sýnir bara hvað ég hyggst hjóla á hverjum degi en vera má að inn á milli verði hvíldardagar vegna veðurs, bilana og þreytu. Svo getur vel verið að þetta gangi miklu betur. Kerran hægir nokkuð á mér sérstaklega í vindi þannig að vindur og veður ræður mestu um hvort ferðin takist.

Frá	Til	km	Uppsafnaðar dagleiðir í km
Reykjavík	Selfoss	57	57
Selfoss	Hvolsvöllur	49	106
Hvollsvöllur	Vík	80	186
Vík	Kirkjubæjarklaustur	72	258
Kirkjubæjarklaustur	Skaftafell	68	326
Skaftafell	Hali	88	414
Hali	Höfn	44	458
Höfn	Djúpivogur	95	553
Djúpivogur	Stöðvarfjörður	80	633
Stöðvarfjörður	Reyðarfjörður	76	709
Reyðarfjörður	Egilsstaðir	30	739
Egilstaðir	Sænautasel	67	806
Sænautasel	Grímstaðir á Fjöllum	79	885
Grímstaðir á Fjöllum	Mývatn	36	921
Mývatn	Akureyri	91	1012
Akureyri	Varmahlíð	96	1108
Varmahlíð	Blöndós	50	1158
Blöndós	Staðarskáli	78	1236
Staðarskáli	Borgarnes	81	1317
Borgarnes	Reykjavík	56	1373